Tryeza e Rrumbullakët për Strategjinë e CSR

Rrjeti CSR Kosova më 19 dhjetor 2017 organizoi Tryezën e Rrumbullakët për të diskutuar Strategjinë e Përgjegjësisë Shoqërore Korporative me palët e interesit, përfshirë institucionet shtetërore, organizatat ndërkombëtare, përfaqësues të universiteteve, shoqërinë civile, asociacionet e biznesit dhe anëtarët e Rrjetit CSR Kosova.

Panelistë në këtë tryezë, të cilët folën rreth rolit të CSR në shoqëri dhe në zhvillimin ekonomik të qëndrueshëm, ishin Ministri i Inovacionit dhe Ndërmarrësisë, z. Besim Beqaj, Ministrja e Integrimit Evropian, znj. Dhurata Hoxha, Drejtori Gjeneral i Raiffeisen Bank në Kosovë, z. Robert Wright, si dhe Drejtori Gjeneral i SharrCem, z. Thomas Glavas.

Gjatë tryezës u prezantua dhe u diskutua Strategjia për Përgjegjësi Shoqërore Korporative për periudhën 2018–2020. Folës nga sektorë të ndryshëm kontribuuan me perspektivat e tyre mbi rëndësinë e institucionalizimit të CSR në Kosovë. Znj. Venera Hajrullahu nga KCSF theksoi rëndësinë e rolit të shoqërisë civile në promovimin e parimeve të CSR, ndërsa z. Edon Kalludra prezantoi praktikat më të mira të Bashkimit Evropian në këtë fushë.

Pjesëmarrësit diskutuan mbi sfidat dhe mundësitë për fuqizimin e rolit të CSR në shoqëri dhe në zhvillimin ekonomik të vendit.

Rrjeti CSR Kosova falënderon të gjithë pjesëmarrësit për prezencën dhe kontributin e tyre në hartimin dhe avancimin e Strategjisë së parë të CSR.