Njihuni me anëtarin tonë: Flexograf

Rrjeti CSR Kosova vazhdon të prezantojë kompanitë anëtare që kontribuojnë në zhvillimin ekonomik dhe promovimin e praktikave të përgjegjshme të biznesit në Kosovë. Në këtë intervistë, z. Berat Mustafa, Drejtor Gjeneral i Flexograf, ndan më shumë rreth veprimtarisë së kompanisë dhe angazhimit të saj në përgjegjësi shoqërore korporative.

Flexograf është e specializuar në fushën e flexoprintimit. Në fabrikën e saj në Gjilan prodhohen ambalazhe për produkte ushqimore dhe jo ushqimore, si për tregun vendor ashtu edhe për eksport në vende evropiane dhe më gjerë. Aktualisht, kompania ka 60 të punësuar në administratë dhe prodhim, duke vazhduar rritjen e saj në mënyrë të qëndrueshme.

Sa i përket planeve për të ardhmen, Flexograf synon të investojë në makineri të reja me efikasitet më të lartë prodhimi, të zgjerohet në tregje të reja dhe të rrisë ekipin profesional, duke ruajtur përkushtimin ndaj përgjegjësisë shoqërore.

Kompania respekton parimet e CSR dhe legjislacionin në fuqi, si dhe mbështet iniciativat e Rrjetit CSR Kosova, përfshirë mentorimin e të rinjve, aktivitetet për mbrojtjen e mjedisit dhe iniciativa filantropike. Flexograf shpreh gatishmërinë për të vazhduar bashkëpunimin në projekte që kontribuojnë në zhvillimin e komunitetit dhe promovimin e praktikave të përgjegjshme të biznesit.