Gala Mbrëmja e Fundvitit e Odës Ekonomike të Kosovës

Oda Ekonomike e Kosovës, anëtare dhe mbështetëse e Rrjetit CSR Kosova, organizoi Gala Mbrëmjen e Fundvitit me një komponent të theksuar të përgjegjësisë shoqërore.

Ngjarja u financua nga kompanitë pjesëmarrëse, ndërsa fondet e mbledhura u dedikuan për mbështetjen e komunitetit të Down Syndrome Kosova. Konkretisht, mjetet do të shkojnë për renovimin e degës në Mitrovicë dhe për sigurimin e qëndrueshmërisë së shërbimeve psikosociale për fëmijët e moshës 0–12 vjeç në katër qendrat e Down Syndrome Kosova.

Kjo iniciativë pasqyron angazhimin e komunitetit të biznesit për të kontribuar në kauza me rëndësi sociale dhe për të mbështetur organizatat që punojnë drejtpërdrejt me grupet më të ndjeshme të shoqërisë.

Përmes aktiviteteve të tilla, kompanitë dëshmojnë se praktikat e përgjegjshme të biznesit shtrihen përtej performancës ekonomike dhe përfshijnë angazhim aktiv në përmirësimin e mirëqenies së shoqërisë.