Dita Ndërkombëtare e Vullnetarizmit: Promovimi i angazhimit dhe mentorimit të të rinjve

Që nga viti 2017, kur vullnetarizmi u institucionalizua për herë të parë në Kosovë përmes Udhëzimit Administrativ për Punë Vullnetare dhe krijimit të platformës KOVO me mbështetjen e Programit të UNICEF në Kosovë në partneritet me Ministrinë e Kulturës, Rinisë dhe Sportit, mbi 12,000 vullnetarë janë regjistruar në këtë platformë.

Ky numër dëshmon gatishmërinë e lartë të të rinjve në Kosovë për të kontribuar në komunitet, duke fituar përvojë profesionale dhe duke zhvilluar aftësi të reja.

Me rastin e Ditës Ndërkombëtare të Vullnetarizmit, Drejtoresha Ekzekutive e Rrjetit CSR Kosova, Linda Tahiri, prezantoi platformën më të re të mentorimit https://mentorship4youth.net/
në një ngjarje të organizuar nga Programi i UNICEF në Kosovë në bashkëpunim me Misionin e OSBE-së në Kosovë, Ministrinë e Kulturës, Rinisë dhe Sportit, Kosovo Volunteers dhe Lens.

Projekti “Mentoring Scheme”, i zbatuar nga Rrjeti CSR Kosova dhe i financuar nga Programi i UNICEF në Kosovë, synon të mentorojë deri në 700 të rinj. Përmes kësaj skeme, të rinjtë mbështeten në forcimin e aftësive të tyre dhe në rritjen e mundësive për t’u bërë pjesë e tregut të punës, proceseve të hartimit të politikave dhe vendimmarrjes.

Rrjeti CSR Kosova inkurajon fuqishëm profesionistët nga sektori privat që besojnë se Përgjegjësia Shoqërore Korporative duhet të jetë vlerë e integruar në praktikat e biznesit që të aplikojnë si mentorë vullnetarë.

Për çdo paqartësi gjatë procesit të aplikimit, ju lutemi na kontaktoni në: info@csrkosovo.org