Rrjeti CSR Kosova dhe Riinvest bashkojnë forcat për mentorimin e të rinjve

Rrjeti CSR Kosova ka nisur zyrtarisht bashkëpunimin me Riinvest me qëllim që të kontribuojë në fuqizimin dhe zhvillimin e të rinjve në Kosovë.

Përmes këtij partneriteti, të rinjtë do të përfitojnë nga mbështetja e mentorëve profesionistë nga sektori privat dhe akademia. Iniciativa synon të forcojë kapacitetet e të rinjve, të rrisë aftësitë e tyre për punësim dhe të krijojë lidhje më të forta ndërmjet arsimit dhe tregut të punës.

Pas ceremonisë së nënshkrimit, Drejtoresha Ekzekutive e Rrjetit CSR Kosova, Linda Tahiri, dhe Rektorja e Kolegjit Riinvest, Bardha Qirezi, diskutuan planin e përbashkët të veprimit që përfshin skema mentorimi, trajnime dhe ligjërata nga profesionistë vullnetarë. Programet do të fokusohen në zhvillimin e ndërmarrësisë dhe në aftësitë praktike të nevojshme për integrim të suksesshëm në tregun e punës.

Ky bashkëpunim reflekton përkushtimin e përbashkët për të investuar në potencialin e të rinjve dhe për të ndërtuar një të ardhme më konkurruese dhe të qëndrueshme për Kosovën.